أول يوم مدرسة... أو حضانة :)

أول يوم مدرسة... أو حضانة :)

دايماً بيكون أول يوم مدرسة/حضانة مليء بمشاعر مختلفة... فرحة وإثارة وحماس وفي أحيان كتير بيكون فيه خوف وقلق وترقب وخصوصا لو كان الطفل أول مره يروح الحضانة أو كانت أول سنة له في المدرسة... فيه نصايح كتير ممكن نعملها تساعدنا وتساعد أولادنا الصغيرين انهم يتعاملوا مع النقلة المهمة جدا دي في حياتهم..

أولا... التحضير لليوم العظيم...

قبل المدرسة بفترة، كلمي طفلك عن المدرسة... المدرسين والأصدقاء، شكل الفصل وحديقة الألعاب... الحصص والأنشطة المختلفة اللي ممكن يعملها هناك... ممكن كمان تحكي له قصة عن طفل بيروح المدرسة أو الحضانة... القصص عامة بتكون مفيدة في إنها تساعد الأطفال على فهم التجارب الجديدة واستيعاب الحاجات اللي ممكن يتعرضوا لها...مهم إن القصة توضح له إن ماما أو بابا حيوصلوه ويرجعوا ياخدوه بعد ما يكون قضى وقت حلو مع أصحابه.

اللعب التمثيلي كمان بيكون من أكتر الوسائل اللي بتساعد الأطفال على التعامل مع مخاوفهم وعلى مواجهة التجارب الجديده... ممكن تلعبوا مع بعض إن هو بابا وحيوصل ابنه (العروسة) المدرسة، أو إن أنت الميس وبتستقبل الأولاد الجداد في الفصل وبتعرفهم عليه... أو تتبادلوا الأدوار فيكون هو الأب اللي حيقول لإبنه مع السلامة وهو داخل الفصل وبيطمنه إنه حيرجع ياخده على البيت بعد شويه...

طبعا لو كان فيه لبس مخصوص أو كنتوا حتشتروا شنطة جديدة فكل ما يشترك في التفاصيل دي كل ما حماسه ممكن يكبر.

كمان، يا ريت لو تروحوا مع بعض زيارة لفصله في المدرسة قبل اليوم المحدد للدخول، زيارة استكشافية يشوف فيها فصله والصورة تكون أوضح بالنسباله...وإن أمكن، صوروه في الفصل ومع مدرسته وخليه يفرج اخواته وجده وجدته على الصور...

ومن أكتر العوامل اللي بتساعد إن أول يوم مدرسة يمر بسلام إنه لو نظام نومه محتاج تعديل ليتماشى مع مواعيد المدرسة، إنه يتم تعديله بشكل تدريجي قبل اليوم المحدد بعدة أيام علشان أول يوم له يكون واخد كفايته من النوم.

في أول يوم...

يُنصح بالصحيان بدري أول يوم بشكل كافي عشان يجهز بدون ما يكون فيه إستعجال أو ضغط عليه أو عليك... حاول تحافظ على جو إيجابي فيه مرح وضحك، وإنه يلحق ياكل وجبة إفطار مغذية ومشبعة لضمان إنه يكون مزاجه معتدل...

لو كان رايح حضانة، فمعظم الحضانات بتسمح للآباء والأمهات بقضاء أول يوم مع أولادهم وبعدين بتبدءوا بالانسحاب لفترات قصيرة تطول بالتدريج. لو كده، استفسروا عن النظام في الأيام الأولى وتأكدوامن إنه مناسب ليكم ولطفلكم.

أما بالنسبة للمدراس فالوضع بيختلف حسب كل المدرسة ونظامها.

ابني بيعيط.. أعمل ايه؟!

طبيعي جدا إن الطفل يعيط ويكون عايز ماما وبابا أول يوم- وجايز أول فتره - لحد ما يتعود على النظام الجديد... ده دليل على قوة العلاقة اللي بناها معاهم وإنها علاقة صحية... الخبر الكويس هو إنه كل ما كانت العلاقة قوية، كل ما النقلة حتكون أسهل بالنسبه له... هو خلاص عارف يعني إيه أمان وثقة فحيعرف يثق في مُدرسته اللي بتلعب دور كبير جدا في دعم إحساسه بالأمان في المدرسة.

طيب، تعملي ايه علشان تسيبيه وأنتي مطمنه؟

أولا، مافيش مشكلة إنك تكوني قلقانه شويه، لكن بلاش تنقلي له إحساسك بالقلق.وحاولي توصلي له ثقتك في إنه حيقدر يتعامل مع الموقف، وثقتك في مُدرسته إنها حتخلي بالها منه وإنه يقدر يعتمد عليها لو احتاج  أي حاجه...

ثانيا، ممكن تخلوا لكم روتين قصير للسلام. ممكن تقولي له مثلا إنك حتمشي دلوقتي وحترجعي له بعد ساعة، بعد كده، احضنيه حضن قصير وبوسيه  وامشي. فيه أطفال بيساعدهم لو قولتي إنك حتمشي قبل 5 دقايق علشان ماتبقاش مفاجأة؛ "فاضل خمس دقايق وأسيبك تلعب مع الميس والأصحاب، تحب نعمل فيهم ايه مع بعض؟" ... كمان ممكن تألفوا أغنية تكون خاصه بالسلام تستعملوها في أي وقت تكونوا محتاجين فيه تسلموا على بعض...

أمور يجب تجنبها...

-         تجنبي تماما إنك تمشي من غير ما هو ياخد باله. ده بيأثر سلبا بشدة على علاقة الثقه اللي بينكم.

-         بعد ما سلمتي عليه ورغم إنه ممكن يكون صعب، تجنبي إنك ترجعي في كلامك أو إنك تقعدي فتره أطول حتى لو لاقيتي إنه حيعيط.

-         تجنبي كمان إنك توعديه بلعبه مثلا أو حاجه حلوه. مافيش داعي للرشاوي.

-          تجنبي إنك تقوليله جمل زي "خليك شاطر وبلاش تعيط!" المدرسة/الحضانة تجربه مهمه ومش سهله بالنسباله ومن حقه يحس بالأمان في التعبير عن مشاعره، وأصلا العياط مالوش دعوه بالشطاره.

وأخيرا...

الثبات والتكرار هم أكتر حاجه بتضمن إن أولادنا يتعلموا الدروس المهمه... فخلي دايما فيه روتين ثابت بيتكرر كل يوم في الصحيان والاستعداد للمدرسة والتوصيل... ده بيساعد إنه يتوقع اللي حيحصل فيحس بالأمان ويكون متعاون وبإذن الله تكون نقله موفقه وسعيده.

وشكرا...