أنا والبيبي بتاعي 1

لما الأم الحامل تحس لأول مرة بحركة البيبي بتاعها جواها بتتكون علاقة مميزة جدا وفريدة من نوعها وبتكون لحظة مؤثرة وجميلة، وكمان معاها بتبدأ علاقة الأم بالبيبي تبقى أقوى وأقوى. طيب هل العلاقة دي علاقة من طرف واحد؟ يعني الأم حاسة بالبيبي بتاعها وهو ميعرفش حاجه عنها؟ ولا هو يعرف؟

الموضوع ده من أكتر الموضوعات العاطفية في التربية. سبحان الله ربنا بيزرع جوه كل بنت عاطفة قوية جدا ناحية أطفالها من قبل ما تشوفهم، دايما الأم لما تعرف أنها حامل نظرتها للحياة بتختلف... مش بتفكر في الدايت والريجيم عشان يكون جسمها شكله حلو على قد ما بتفكر في البيبي اللي جواها ده - اللي هي لسه حتى متعرفش هو ولد وللا بنت - يكون صحته كويسة، وبتتحمل مصاعب الحمل ومتاعبه بحب عشان البيبي الصغير ده يكبر وبتبقى مستنيه اللحظة اللي تشيله فيها لأول مرة وتطبطب عليه مع إنها ممكن تكون خايفه جدا من الولادة. على ما أظن دي الأمومة. دي الحاجة اللي ربنا سبحانه وتعالى حطها في قلوبنا – الإحساس الصادق جدا اللي يخلينا من غير تفكير ممكن نضحي بحياتنا عشان خاطر حد احنا لسه مشوفنهوش أساسا.

أكيد مش بعد كل ده البيبي مش حيكون عارف مامته الإنسانه اللي بتحبه الحب ده كله. اللي احنا منعرفوش أن البيبي فعلا بيكون عارف مامته طيب ازاي ؟؟؟؟؟ حقولكوا... علميا البيبي يقدر يميز صوت مامته من الشهر السادس في الحمل. بيكون سامع كل حاجه مامته سمعاها لكن صوت مامته بيكون أوضح وأعلى صوت هو بيسمعه، عشان كده البيبي الصغير أوي بيطمن بصوت مامته. المفاجأة كمان انهم اكتشفوا أن دقات قلب البيبي بتهدى لما يسمع صوت مامته بتتكلم وكمان بيمص أسرع. المفاجأة أن البيبي كمان من نبرة صوت مامته بيقدر يميز اللغة اللي بتتكلم بيها وبيفضلها بعد ولادته عن أي لغة تانيه، ده لأن كل لغة ليها نبرة مميزة وخاصة.

نصايح:

·       نتكلم مع البيبي على قد ما نقدر، ممكن كمان نقوله صباح الخير أول ما نصحى مين عارف مش يمكن يفهم كده امتى بنصحى وامتى بنام ويوفر علينا شويه تعب بعد كده؟

·       نحاول نقلل من تواجدنا في أماكن دوشة خصوصا اللي فيها طبل جامد.

·       لو في حاجه بتحبيها سمعيها للبيبي كتير أثناء فترة الحمل حتكون مصدر للاطمئنان بالنسبه له بعد الولادة.

تابعونا مع المزيد...

أم سومي