التنمر من المصطلحات الجديدة اللي دخلت قاموسنا حديثا واللي التوعية بخصوصها من الظواهر الإيجابية جدا اللي بقت موجودة على ال social media... لكن الحقيقة الكلمة بقت بتتقال كتير شويتين في مواقف لا ينطبق عليها مواصفات التنمر وده للأسف مش مفيد وممكن يسبب مشاكل وحأقولكم ليه لكن بعد ما أشرح يعني ايه تنمر الأول...
التنمر أو الbullying يعني تعرض شخص للأذى بشكل متكرر من شخص تاني... ممكن الأذى المتكرر ده يكون أذى نفسي بكلمات مثلا أو بنبذ الشخص، أو ممكن يكون أذى بدني... الفكرة إن التكرار يعتبر من أهم سمات التنمر... زي مثلا ولد معين بيستقصد ولد تاني معاه في المدرسة... ممكن يكون فيه ضرب بيحصل أو مضايقات بالكلام والألفاظ. وده غالبا التنمر عندالصبيان... الموضع مع البنات بيبقى عاطفي أكتر... ممكن مثلا بنت تتعرض لإن زميلاتها في الفصل يتريقوا على لبسها أو على طريقة كلامها بشكل متكرر ومستمر، أو يقرروا إنهم كل مرة مايرضوش يتكلموا معاها أو يتفقوا إنهم يبطلوا يصاحبوها.
بالإضافة للنمر اللفظي والتنمر البدني، فيه كمان التنمر اللي بيحصل على الإنترنت وعلى مواقع التواصل الاجتماعي أو الcyber bullying ، وده انتشر جدا لأسباب كتير وللأسف التنمر بأنواعه ليه تبعات كتير سيئة على نفسية الأطفال.
معنى الكلام ده إنه لو ابني في المدرسة واحد شتمه مرة واحدة بس ده مايبقاش تنمر... ده مجرد موقف سيء الطفل اتعرض له.
لو بنيتي حضرت درس وبنت في المجموعة ضايقتها، ده مش تنمر، ده موقف سيء بنتي تعرضت له.
تفرق ايه لو ده تنمر ولا لأ؟! تفرق كتير لإن الأمهات لما بيحسوا إن ابنهم أو بنتهم ضحية للتنمر إحساسهم بالموقف غالبا بيكبر وبيوصل لولادهم... يعني فيه أمهات بتعمل victimisation لولادهم أو بناتهم وبالتالي الولاد بيحسوا إنهم ضحية لحاجة صعبة جدا وبيصعب عليهم نفسهم وده للأسف مش بس بيخليهم عرضة للمزيد من المواقف الصعبة، لكن أحيانا بيبقوا أكنهم بيبحثوا بعنيهم عن المواقف الصعبة وبيختاروا يدوا لها تركيز ويكبروها بدون داعي.
من الأخطاء اللي بتحصل في التعامل مع التنمر أو المواقف السيئة اللي الأطفال ممكن يتعرضوا ليها هو إن أحيانا فيه أمهات بتتحفز على ابنها أو بنتها نفسهم... وبيتفتح سيل من الأسئلة من نوعية "وأنت ازاي تسكت له؟!"، "ازاي تسيبه يقولك كده؟!"، "ازاي ماتخدش حقك؟!" وده للأسف بدل ما يساعد الطفل على التعامل مع الموقف بشكل صحي، بيخليه يحس بالذنب والخزي إنه ضيع حقه وبيفكر إنه ضعيف ومابيعرفش... واحتمال كبير إنه بعد كده ببساطة يبطل يحكي لمامته طالما هو اللي بيطلع غلطان.
أحيانا كمان فيه أمهات بتسارع بإنها تروح للطفل اللي ضايق بنتها أو ابنها عشان تاخدله حقه... ودي في الحقيقة مش أحسن طريقة للتعامل مع الموضوع... هو مافيش مشكلة من مساعدة الطفل وتشجيعه ودعمه لما ييجي ياخد حقه، لكن في الآخر بنكون محتاجين إنه يتعلم إن هو اللي يقف ويدافع عن نفسه.
كده اتكلمنا عن تعريف التنمر واتكلمنا شويه عن حاجات نتجنبها واحنا بنتعامل معاه....
البوست الجاي إن شاء الله نتكلم عن ازاي نساعد ولادنا/بناتنا لو اتعرضوا للتنمر.
مها عادل
ميتا كوتش مستشار نفسي وتربوي
ليست هناك تعليقات:
إرسال تعليق