جربت كل
أنواع العقاب ومافيش حاجه نافعه... لسه بيضرب أخوه، ومهمل في حاجته، وبيتعبنا
علشان يذاكر...
دي شكوى
آباء وأمهات كتير، وغالبا
بتكون الجملة اللي بعدها، ايه العقاب اللي ممكن أعاقبه علشان يسمع الكلام؟
وكده كأن
التربية بقت سمعان كلام أو عقاب! مع إن التربية ليها معاني أكثر عمقا من كده
بكتير، بس تعالوا الأول قبل ما نجاوب على السؤال ده، نُعرِّف معنى العقاب...
تعريف العقاب:
العقاب
يعني إحداث ألم بدني (ضرب، تذنيب، يعيد كتابة الجملة كذا مره) أو معنوي (يجلس في
الركن وحده، زعيق، إهانة، تأنيب، لوم، أو حرمان من شيء محبوب) للطفل بهدف إنه يبطل
سلوك معين.
والعقاب له
مواصفات معينة، منها مثلا إنه بيكون غير مرتبط بسلوك الطفل... فمثلا ممكن أم تعاقب
ابنها بإنها تحرمه من التلفزيون لإنه ضرب أخوه، أو إنه مش حياخد مصروف علشان
مابيسمعش الكلام... أو إنه يتبستف ويتأنب لإنه دلق اللبن على الأرض... أو ويتزعقله
لإنه ضيع أقلامه الجديدة لثالث مرة في المدرسة.
كمان، بيميز
العقاب، إنه كتير جدا بيكون تلقائي بدون تفكير كتير من الشخص اللي بيعاقب نتيجة...
طيب، وايه
اللي بيحصل لما بنعاقب؟
تعالوا نقيم
الموضوع من أربع جوانب مهمة:
أولا،
علاقة الطفل بالشخص اللي بيعاقبه... هل العقاب بيخلي العلاقة
بين الطفل والشخص اللي بيعاقبه شكلها ايه؟ هل حيفكر إن فعلا عندها حق ماما إنها
تعاقبني؟ أو يا ترى حيفكر إن المدرسة بتاعته فعلا عايزه مصلحته وعشان كده زعقتله
قدام الفصل كله؟ ولا الأرجح إنه حيفكر إن ماما مش بتحبني؟ وجايز حتى يفكر أد ايه هو
حظه سيء لإن مامته شديده معاه في حين إن مامت صاحبه أطيب بكتير... وإن المدرسة
شريرة وإنه أصلا مش بيحب أبدا المادة اللي هي بتدرسها له؟ تخيل نفسك لو كنت مكانه
حتفكر في ايه؟
ثانيا، تأثير العقاب على ثقة الطفل في نفسه
وتقديره لذاته... هل العقاب حيساعده إنه يشوف نفسه كشخص صالح بيعرف يتصرف
وبيقدر يفكر في حلول؟ ولا حيخليه يشوف إنه غلطان ويتعلم إنه يلوم نفسه بدل ما يحبها ويقدرها؟
ملحوظة:
لما الطفل بيشوف نفسه إنه وحش ودايما بيزعل بابا وماما منه، بيبقى بالفعل وحش
ودايما بيزعل بابا وماما، وده معروف في علم النفس بنبوءة التحقيق الذاتي self-fulfilling prophecy.
وكمان، وارد يفكر إنه دايما بيتظلم وإن العقاب مش عادل وده ممكن يخليه يعيش
دور الضحية بدل ما يتحمل مسؤولية خطؤه.
ثالثا، هل
العقاب بينمي الضمير والدافع الذاتي للطفل؟ بمعنى هل
العقاب حيخلي الطفل يختار إنه يعمل الصح حتى لو ماكنش عليه رقيب؟ ولا احتمال يخليه
يلجأ للكذب أو يفكر ازاي المرة الجايه يداري نفسه ويتحايل بشكل أحسن عشان مايخليش
حد يكتشف خطأه؟
رابعا، يا
ترى هل العقاب بيعلم الدرس؟ يعنى، لو ابني ضيع قلم فأنا
زعقتله، هل كده حيبطل يضيع أقلامه ويتعلم إزاي يحافظ عليهم؟ أو لو دلق اللبن
فاتهزأ، هل كده حيتعلم إنه يتحمل مسوؤلية أفعاله فينظف اللي اتدلق؟ طيب لو اتخانق
مع أخوه وضربه، هل لو ضربته حعلمه إن الضرب غلط؟ ولا حعلمه إن ممكن تضرب طالما إنت
الأكبر والأقوى؟ وهل كده حبقى علمته إزاي يحل مشاكله مع أخوه؟ ولا حيحس إني بفضّل
أخوه عليه وحديله سبب إنه يضرب أخوه تاني؟ وجايز برده يبطل ضرب لكن يحتفظ في قلبه
بمشاعر سلبية اتجاه أخوه تظهر بعدين لما يكبر.
الحقيقة إن
إجابات الأسئلة اللي فوق كلها بتقول إن العقاب وسيلة ليها مساوئ متعدده. مش بس
كده، ده كمان الأبحاث والدراسات بتأكد مساوئ العقاب وعدم فعاليته...
فمثلا، ألفي
كوهن - الباحث والمؤلف الأمريكي - بيتكلم في كتابه "التربية الغير
مشروطة" إن العقاب أثبت عدم فعاليته لإيقاف السلوك اللي كان بيتم العقاب
بسببه.. وبيقول إن فيه بحث مثلا بيثبت إن الأطفال اللي بيتم معاقبتهم بسبب كسرهم
للقواعد في المنزل بيكسروا القواعد أكتر لما بيكونوا بعيد. ده طبعا غير الأبحاث
الكتير اللي بتتكلم عن أضرار العقاب البدني على نفسية الأطفل وعلى تكوين عقله.
طيب، وبالنسبة لفكرة إننا نعزل الطفل في مكان لوحده لما يخظئ أو ما يسمى
بالتايم أوت؟
التايم أوت
من أشهر أنواع العقاب اللي ناس
كتير بتفكر إنه كويس لإن مافيهوش عنف، لكن عزل الطفل ليه مشاكل كتيره... أولها إن
فعليا أهالي كتير بيلجأوا للعنف لإلزام الطفل إنه يقعد في الكان المخصص. وكمان دكتور
دانيل سيجل وتينا برايسون في كتابهم "تربية بدون دراما" بيأكدوا إن
تصوير الدماغ بيقول إن الألم الناتج عن العزل بيكون شديد الشبه بالألم الناتج عن
الضرب، وده لإن الشعور بالانتماء وبالتواصل الاجتماعي من أهم الاحتياجات عند
الأطفال، واللي بيفتقدها الطفل بشده لما بيتم عزله في مكان لوحده بعد الخطأ اللي
ارتكبه.
ونرجع تاني
للسؤال، لو كان العقاب له مساوئ كتير وغير مجد لتعديل السلوك، فهل فعلا عايزين
نعاقب؟ ولو مش حنعاقب، فايه اللي احنا محتاجين فعلا نستعمله لتربية أولادنا وتعديل
سلوكياتهم؟ الإجابة ببساطة في القدوة، والتواصل الفعال...وفي إننا نحاول نفهم
دوافع الطفل اللي بتسبب سلوكه السلبي علشان نقدر نوجه أولادنا صح ونحافظ على
علاقتنا بيهم.
وللحديث بقية في المقالات الجايه. :)
